Markaziy bank O‘zbekistonda bir kishiga to‘g‘ri keladigan bank kartalari sonini chekladi. Cheklash qanday bo‘ladi?
2025-yil 1-yanvardan 31-dekabrga qadar O‘zbekistonda bir kishiga 20 tagacha rasmiylashtirilgan bank kartalari soniga vaqtinchalik cheklov amal qiladi. Yangi qoida ham jismoniy, ham virtual kartalarga taalluqlidir.
Foydalanuvchilarning aksariyati, taxminan 97%, 5 tagacha, 3% dan kamrog‘i 5 dan 20 tagacha va faqat 0,03% 20 dan ortiq kartaga ega.
Cheklov ba’zi kartalar egasining roziligisiz firibgarlik sxemalarida foydalanilishini nazoratga olish va suiiste’mol qilishning oldini olish maqsadida joriy etilgan. Ruxsat etilgan 20 ta kartadan 5 tasi bitta bankda rasmiylashtirilishi mumkin.
Markaziy bank, shuningdek, 1-noyabrdan boshlab firibgarlik operatsiyalarining oldini olish maqsadida onlayn kreditlarni rasmiylashtirishga cheklovlar kiritdi. Ilova orqali ariza topshirgan fuqarolar endi shaxsini tasdiqlash uchun biometrik identifikatsiyadan o‘tishlari kerak bo‘ladi. Yil boshidan buyon onlayn kreditlarni firibgarlik yo‘li bilan rasmiylashtirib, 15 mlrd so‘m zarar yetkazilgan 463 ta holat qayd etilgan.
Ushbu chora-tadbirlar O‘zbekiston moliya sektorida xavfsizlikni kuchaytirish va fuqarolar himoyasini ta’minlashga qaratilgan. Ular bank kartalari va onlayn kreditlarni rasmiylashtirishda suiiste’molliklar sonini kamaytirishi kutilmoqda.
