Ijtimoiy kartalar qanday ishlaydi va ularni kimlar rasmiylashtira oladi?

Ijtimoiy kartalarning vazifalari

Ijtimoiy kartalar BAAning Oxinus Holding Ltd kompaniyasi bilan hamkorlikda ishlab chiqilgan "Ijtimoiy karta" (Baraka) tizimi asosida ishlaydi. Ular to‘lov vositasi vazifasini bajaradi, Xalq banki va "Aloqabank" esa ularning moliyaviy agentlari hisoblanadi.

Birinchi bosqichda kartalar to‘qqiz turdagi ijtimoiy to‘lovlardan birini oluvchi fuqarolarga BEPUL taqdim etiladi:

• yoshga doir nafaqa;
• nogironlik nafaqasi;
• yolg‘iz keksalar va nogironligi bo‘lgan shaxslarga moddiy yordam;
• kam ta’minlangan oilalarga bolalar nafaqalari;
• kam ta’minlangan oilalarga moddiy yordam;
• 18 yoshgacha bo‘lgan bolalarga nogironlik nafaqasi;
• nogironligi bo‘lgan bolalarni parvarishlayotgan onalarga nafaqa;
• boquvchisini yo‘qotganlik nafaqasi;
• protez-ortopediya buyumlari va reabilitatsiya texnik vositalarini xarid qilish uchun vaucher.

2025-yil 1-fevraldan boshlab nogironligi bo‘lgan shaxslarni reabilitatsiya qilish qurilmalarini xarid qilish xarajatlarining bir qismi (BHMning 30%igacha yoki 112 500 so‘mgacha) ijtimoiy kartaga o‘tkaziladi.

Kartadan alkogol va tamaki mahsulotlari (pensiyadan tashqari) uchun to‘lovlarni amalga oshirishda foydalanish taqiqlanadi.

1-apreldan "Saxovat va ko‘mak," "Ayollar daftari" va "Yoshlar daftari" jamg‘armalari mablag‘lari hisobidan homiladorlik va tug‘ish nafaqalari hamda bir martalik yordam pullarini to‘lashda ijtimoiy kartalardan foydalanish boshlanadi. Bundan tashqari, karta imtiyozli toifadagi fuqarolar uchun bepul yo‘l haqi, qolganlar uchun - standart tarif kabi transport chiptasi funksiyalarini bajaradi.

Keyinchalik ijtimoiy karta quyidagilar uchun ham ishlatiladi:

• samolyot va poyezdlarga imtiyozli chiptalar sotib olish;
• bepul davlat ijtimoiy xizmatlaridan foydalanish;
• tibbiy, ijtimoiy va kasbiy reabilitatsiya (nogironligi bo‘lgan shaxslar uchun);
• imtiyozli ipoteka yoki ijtimoiy uy-joyni rasmiylashtirish (nogironligi bo‘lgan shaxslar uchun);
• dori vositalarini arzonlashtirilgan narxlarda yoki bepul xarid qilish (nogironligi bo‘lgan shaxslar uchun);
• yuridik yordam olish;
• madaniy meros obyektlariga tashrif buyurish.

2027-yil boshiga qadar barcha ijtimoiy to‘lovlarni ijtimoiy kartalarga o‘tkazish rejalashtirilgan.

Kimlar ijtimoiy karta olishi mumkin?

Quyidagilar ijtimoiy kartani bepul rasmiylashtirishlari mumkin:

• Kam ta’minlangan oilalar reyestriga kiritilgan oilalar (shaxslar);
• Ijtimoiy himoya yagona reyestrida kam ta’minlangan deb e’tirof etilgan oilalar;
• ko‘p bolali oilalar;
• nogironligi bo‘lgan shaxslar;
• o‘zgalar parvarishiga muhtoj bo‘lgan yolg‘iz keksa fuqarolar;
• o‘zgalar parvarishiga muhtoj bo‘lgan shaxslarni parvarishlayotgan shaxslar;
• yetim bolalar va ota-ona qaramog‘idan mahrum bo‘lgan bolalar;
• vasiylar (homiylar), tutingan ota-onalar;
• muomalaga layoqatsiz shaxslar va muomala layoqati cheklangan shaxslar;
• muomalaga layoqatsiz va muomala layoqati cheklangan shaxslarning qonuniy vakillari;
• pensionerlar;
• budjetdan stipendiya oluvchi talabalar va o‘quvchilar;
• jamoat transportida (taksidan tashqari) bepul yurish huquqiga ega bo‘lgan shaxslar.

Kartani olish uchun ariza uch ish kuni ichida ko‘rib chiqiladi. O‘zgalar parvarishiga muhtoj fuqarolar uchun 15 kun ichida uylariga yetkazib berish ko‘zda tutilgan. 1-iyuldan boshlab O‘zbekistonning barcha hududlarida bosqichma-bosqich kartalar berish boshlanadi.

Ijtimoiy kartani qayerda rasmiylashtirish mumkin?

Tajriba-sinov bosqichida arizalar "Inson" markazlari orqali qabul qilinadi. Markaz manzillarini BU YERDA ko‘rishingiz mumkin

Keyinchalik ijtimoiy kartani YIDXP, "Ijtimoiy karta" mobil ilovasi orqali, shuningdek Xalq banki va "Aloqabank" bo‘limlarida rasmiylashtirish mumkin bo‘ladi.

Vazirlar Mahkamasining 2024-yil 27-dekabrdagi qarorida boshqa toifadagi fuqarolar uchun ham ijtimoiy kartalarni rasmiylashtirish imkoniyati nazarda tutilgan. Kartaning elektron versiyasi bepul, plastik versiyasi esa BHMning 10 foizigacha (37 500 so‘m) miqdorda beriladi.

Avvalroq Pulbek.uz Markaziy bank Markaziy bank bir kishiga 20 tagacha bank kartalari berishni vaqtincha cheklaganini ma’lum qilgan edi.